مفلوق دوت كوم-01

نظرات على بدع البيزنس الإسلامي و الصحوة الصينية

أول أمس ، في حوار مع أخويا ع التليفون كان بيحكيلي على محل ملابس محجبات و منقبات شافه، حاطط في الفاترينة مانيكانات بلاستيك و ملبسها نقاب ، و أمس تهت شوية كالعادة أثناء محاولاتي المستميتة للخروج من المعادي (الي كانت ضاحية لما كنا صغيرين و كانوا يكتبوا عليها كده في المغامرين الخمسة) المهم لمحت يافطة محل اسمه ايه بقى؟ اسمه "بلو جوب" طبعا ممكن يكون الحمار الي سماه و الأحمر الي رخصله المحل بالاسم ده مايعرفش ان الكلمة الأمريكاني السلانج دي تعني الجنس الفمي ، بس مش دي المفارقة، الألطف انه بوتيك ملابس داخلية حريمي ، و بمناسبة الصيف و حر الصيف حاطط يافطة إعلان بيقول فيها "يوجد مايوه إسلامي" ... الله؟ ايه يا بني؟ انت مع دول و لا مع دول؟ المهم ، كلمة مايوه إسلامي دي نرفزتني، خلاص؟ هان علينا الدين نلصق اسمه بمايوه؟ هو ده تكريم الدين؟ و لا ولاد الكلب دول مستعدين يعبوا الدين نفسه في قزايز و يبيعوه لو هايجيبلهم قرش؟ (سوري، ممكن لساني يطول شوية في البوست ده علشان من ساعة اضراب الرابع من مايو المأسوف على شعبه العاجز الي ماقدرش يقوم بيه ، و أنا مفلوق و كنت مستني طوبة تفجرني، فسامحوني في طولة اللسان شوية) المهم ، قلت لنفسي أعمل بحث صغير كده و نشوف و نجمع الحاجات الي ملوك السبوبة بيلزقوها في الدين ظلما و عدوانا و يلزقوا فيها كلمة "إسلامي" عمال على بطال

و قبل ما يطلع لي عيل منهم يقولي الاكليشيه الخايب بتاعهم "كلمة إسلامي مضايقاكم في ايه" هاسبق أنا و ارد و اقوله: لا يا افندي، مش مضايقاني في حد ذاتها، بالعكس، تسعدني قوي لما تكون محطوطة بعد الكلمة الصح، علم الفقه الإسلامي ، الفن الإسلامي ، الفلسفة الإسلامية ، العمارة الإسلامية، كل الحاجات دي طلعت مع احتكاك الإسلام مع الحضارات الكبيرة الي وصل اليها زي مصر و الشام و الهند و الأندلس، و لا واحد منها خرج من جزيرة العرب البترولية الي بتمولكم بهدف التسود و الصدارة و النفوذ ، ماخرجش منها غير صرعة الغوغاء الوهابية ، و لو كان ربنا سبحانه و تعالى اختار بعث الرسول من بينهم ، فده لاثبات طلاقة القدرة، المسيح رسول الحب و السلام يخرج من بين اليهود غلاظ الأكباد، و سيد الخلق محمد يبعث من بين البدو الأجلاف، و مش بس الفنون و الفلسفة، كمان علم الفلك و الجبر و حساب المثلثات و الاجتماع كلها إسلامية الأصل، و مع ذلك ماحطيناش بعدها كلمة إسلامي، عارفين ليه؟ علشان ماكناش مجانين و ماكانش عندنا لوثة، كان العظماء الأجلاء الي ابتكروها عارفين ان العلوم لا تنسب لدين، فهي ملك كل البشرية، ده بقى لما كان عندنا قدرة على العطاء الحضاري، أما النهاردة، في ظل حضارة الاستهلاك السعودية الي بيقولوا عليها إسلامية، بقينا بنبدع الحاجات الي مرصوصة تحت دي، اسم الله علينا و على حوالينا

المايوه الإسلامي طبعا زي ما قلنا؟؟؟ هو ده لما ننزل الميه كده ان شاء الله مش هايشف و لا يصف؟؟؟ تقاليع و كلام فارغ،و اللي لابساه دي اصلا شكلها من أوكرانيا، بس ده مش مهم

ده بقى حضراتكم الهاتف الإسلامي، مكتوب عليه من فوق بالحفر "محبة الرحمن" و تحتها على طول ماركة التليفون، تتقري على بعضها "محبة الرحمن نوكيا" يا أمة ضحكت، بس برده ده مش مهم

المسنجر الإسلامي ، و في رواية أخرى المسنجر الدعوي!!! ده بقى علشان نستخدم الشات في الدعوة للوهابية السلفية، فتبقى كده ان شاء الله بتعمل شات و تحسب لك بكل دقة على الكيبورد حسنات، و عاملين سايت عليه كيف تحول المسنجر العادي إلى مسنجر إسلامي ، لقد تغيرت رائحتك يا ماسنجر؟ لقد صبأت؟ لكن هنقول ايه، ماااااشي برده ده مش مهم

ده بقى الكليب الإسلامي!!! آه ياني ، لكن معلش، يعني هي جت على ده، مش مهم

نيجي بقى للمهم، لما الدلع و الكلام الفارغ يبقى في الحاجات الفارغة الي فوق دي، مش مهم، هانقول تقاليع، لكن ده بقة هو المهم ، لما نوصل لصحة الناس، و يبقى النصابين الي بيقوموا بيه أطباء!!! يبقى لأ، لنا هنا وقفة ، صحيح النصبة دي عالمية، لدرجة ان فيه اتحاد عالمي للطب الاسلامي، بس ده اولا مش دليل على حق، لأن اي شوية صيع في دولة حرة زي أمريكا ممكن يكونوا الاتحاد ده، طالما أطباء، ثانيا، هناك في ظل القوانين الصارمة و الرقابة على الممارسات الطبية مش هايقدروا يضروا حد، يا هايعالجوا بالعلاجات الطبية السليمة و يبقوا يرقوا المريض بعدها، لكن هنا، و زي ما بيحصل بالفعل، الناس بتموت من شرب بول الابل ، و من علاجات السكر الموهومة، يبقى دي بقى لازملها وقفة و طرقعة، ان شاء الله لو كان في العمر بقية، البوست القادم لتحطيم أصنام الطب الإسلامي المزعوم، و الله المستعان على ما يصفون من جهل و سقم باسم الدين الجليل