18.5.08

مفلوق دوت كوم-01

نظرات على بدع البيزنس الإسلامي و الصحوة الصينية
أول أمس ، في حوار مع أخويا ع التليفون كان بيحكيلي على محل ملابس محجبات و منقبات شافه، حاطط في الفاترينة مانيكانات بلاستيك و ملبسها نقاب ، و أمس تهت شوية كالعادة أثناء محاولاتي المستميتة للخروج من المعادي (الي كانت ضاحية لما كنا صغيرين و كانوا يكتبوا عليها كده في المغامرين الخمسة) المهم لمحت يافطة محل اسمه ايه بقى؟ اسمه "بلو جوب" طبعا ممكن يكون الحمار الي سماه و الأحمر الي رخصله المحل بالاسم ده مايعرفش ان الكلمة الأمريكاني السلانج دي تعني الجنس الفمي ، بس مش دي المفارقة، الألطف انه بوتيك ملابس داخلية حريمي ، و بمناسبة الصيف و حر الصيف حاطط يافطة إعلان بيقول فيها "يوجد مايوه إسلامي" ... الله؟ ايه يا بني؟ انت مع دول و لا مع دول؟ المهم ، كلمة مايوه إسلامي دي نرفزتني، خلاص؟ هان علينا الدين نلصق اسمه بمايوه؟ هو ده تكريم الدين؟ و لا ولاد الكلب دول مستعدين يعبوا الدين نفسه في قزايز و يبيعوه لو هايجيبلهم قرش؟ (سوري، ممكن لساني يطول شوية في البوست ده علشان من ساعة اضراب الرابع من مايو المأسوف على شعبه العاجز الي ماقدرش يقوم بيه ، و أنا مفلوق و كنت مستني طوبة تفجرني، فسامحوني في طولة اللسان شوية) المهم ، قلت لنفسي أعمل بحث صغير كده و نشوف و نجمع الحاجات الي ملوك السبوبة بيلزقوها في الدين ظلما و عدوانا و يلزقوا فيها كلمة "إسلامي" عمال على بطال

و قبل ما يطلع لي عيل منهم يقولي الاكليشيه الخايب بتاعهم "كلمة إسلامي مضايقاكم في ايه" هاسبق أنا و ارد و اقوله: لا يا افندي، مش مضايقاني في حد ذاتها، بالعكس، تسعدني قوي لما تكون محطوطة بعد الكلمة الصح، علم الفقه الإسلامي ، الفن الإسلامي ، الفلسفة الإسلامية ، العمارة الإسلامية، كل الحاجات دي طلعت مع احتكاك الإسلام مع الحضارات الكبيرة الي وصل اليها زي مصر و الشام و الهند و الأندلس، و لا واحد منها خرج من جزيرة العرب البترولية الي بتمولكم بهدف التسود و الصدارة و النفوذ ، ماخرجش منها غير صرعة الغوغاء الوهابية ، و لو كان ربنا سبحانه و تعالى اختار بعث الرسول من بينهم ، فده لاثبات طلاقة القدرة، المسيح رسول الحب و السلام يخرج من بين اليهود غلاظ الأكباد، و سيد الخلق محمد يبعث من بين البدو الأجلاف، و مش بس الفنون و الفلسفة، كمان علم الفلك و الجبر و حساب المثلثات و الاجتماع كلها إسلامية الأصل، و مع ذلك ماحطيناش بعدها كلمة إسلامي، عارفين ليه؟ علشان ماكناش مجانين و ماكانش عندنا لوثة، كان العظماء الأجلاء الي ابتكروها عارفين ان العلوم لا تنسب لدين، فهي ملك كل البشرية، ده بقى لما كان عندنا قدرة على العطاء الحضاري، أما النهاردة، في ظل حضارة الاستهلاك السعودية الي بيقولوا عليها إسلامية، بقينا بنبدع الحاجات الي مرصوصة تحت دي، اسم الله علينا و على حوالينا

المايوه الإسلامي طبعا زي ما قلنا؟؟؟ هو ده لما ننزل الميه كده ان شاء الله مش هايشف و لا يصف؟؟؟ تقاليع و كلام فارغ،و اللي لابساه دي اصلا شكلها من أوكرانيا، بس ده مش مهم

ده بقى حضراتكم الهاتف الإسلامي، مكتوب عليه من فوق بالحفر "محبة الرحمن" و تحتها على طول ماركة التليفون، تتقري على بعضها "محبة الرحمن نوكيا" يا أمة ضحكت، بس برده ده مش مهم









المسنجر الإسلامي ، و في رواية أخرى المسنجر الدعوي!!! ده بقى علشان نستخدم الشات في الدعوة للوهابية السلفية، فتبقى كده ان شاء الله بتعمل شات و تحسب لك بكل دقة على الكيبورد حسنات، و عاملين سايت عليه كيف تحول المسنجر العادي إلى مسنجر إسلامي ، لقد تغيرت رائحتك يا ماسنجر؟ لقد صبأت؟ لكن هنقول ايه، ماااااشي برده ده مش مهم

ده بقى الكليب الإسلامي!!! آه ياني ، لكن معلش، يعني هي جت على ده، مش مهم


نيجي بقى للمهم، لما الدلع و الكلام الفارغ يبقى في الحاجات الفارغة الي فوق دي، مش مهم، هانقول تقاليع، لكن ده بقة هو المهم ، لما نوصل لصحة الناس، و يبقى النصابين الي بيقوموا بيه أطباء!!! يبقى لأ، لنا هنا وقفة ، صحيح النصبة دي عالمية، لدرجة ان فيه اتحاد عالمي للطب الاسلامي، بس ده اولا مش دليل على حق، لأن اي شوية صيع في دولة حرة زي أمريكا ممكن يكونوا الاتحاد ده، طالما أطباء، ثانيا، هناك في ظل القوانين الصارمة و الرقابة على الممارسات الطبية مش هايقدروا يضروا حد، يا هايعالجوا بالعلاجات الطبية السليمة و يبقوا يرقوا المريض بعدها، لكن هنا، و زي ما بيحصل بالفعل، الناس بتموت من شرب بول الابل ، و من علاجات السكر الموهومة، يبقى دي بقى لازملها وقفة و طرقعة، ان شاء الله لو كان في العمر بقية، البوست القادم لتحطيم أصنام الطب الإسلامي المزعوم، و الله المستعان على ما يصفون من جهل و سقم باسم الدين الجليل

18 comments:

ايوية said...

عزيزى دكتور اياد
احيك على هذا الموضوع فقد اصبح مستفز لى جدا اى شى دلوقتى علشان تعملة دعايو يبقى تجعلة شكل دينى مثال اكب بيجبلى الضغط اعلانات التليفزيون
عن الادوية او مستحضرات التجميل الى بتبداء باية قرائنية
نصب وتضيع صحة الناس باسم الدين والطب النبوى
ارجو من حضرتك لانك اقدر من يتحدث فى هذا الموضوع ارجوك اتكلم فية عن اعلانات الادوية التى لا تراقب من اى جهة رقابية اذا كانت هناك جهات رقابية فى الدولة اصلا
ولازم تبداء بقران وتنتهى بقران
ويكون بطل الاعلان بيفتى فى الدين
تحياتى

Meero Deepo said...

د.إياد

كلامك عن إسلامى دوت كوم فكرنى بزيارتى لمسجد العزيز بالله

مسجد يقع فى شارع شهير فى الزيتون يعلن عن مسابقة لكتابة بحث عن الرسول صلى الله عليه وسلم

قلت أروح ياعم ..أصلى فى المسجد وأسأل عن المسابقة وأهو يبقى عملنا حاجة عدلة فى الدنيا دى

ركز بقى معايا فى الشارع

شارع طويل جدا ...مزدحم جدا... ممتلئ بالمحلات ...وكلها تحمل اسم...إسلامى

محل العباءة الإسلامية
محل الرداء الإسلامى
محل الموبايل الإسلامى
محل الكتاب الإسلامى

واحد صديقى مسيحى كان يعيش فى هذا الشارع ..الإسلامى جدا... وربنا أكرمه وتاب عليه من البلد دى ... وهاجر

حكيت له عن زيارتى للشارع ...ولأنه مصرى جدع... تقبل دعاباتى لما قلت له ... " إيه ده ..داإنت تلاقيك كنت حافظ كل خطب الجمعة "

ضحك وقالى ...عارفة...بعض المحلات اللى تحمل إسم إسلامى ده ...أصحابها ....مسيحيين ... وأنا عارفهم ... بس الرزق يحب الخفية

أحد المرات لما سألوا صافى ناز كاظم ..تحبى نقولك الكاتبة الإسلامية ولا إيه...قالت لهم ... الواضح لا يعرف

يعنى لو إحنا مسلمين بجد سلوكنا هو اللى حيخلي إسلامنا واضح ...من غير يفط إسلامية!!!1

اجندا حمرا said...

عزيزي دكتور اياد
موضوع هام بشكرك عليه
كل الأمثله اللي ذكرتها عزيزي بتحاول تستغل الدين بأي شكل تمام زي اللي سمعته عن اللحاف الأسلامي حاجات غريبه بقينا بنسمع عنها في ايامنا ديه مش عارفه حتودينا لفين و لو جينا نتكلم و نحاول نستفسر تلاقي مليون صوت بيقولك اعداء الأسلام

تمام زي الصوره الغريبه اللي انتشرت بتاعت الملتحي و السيده المنقبه في البحر و هو يعانقها كتير قالولك و ايه يعني مايمكن تكون مراته ال يعني شافوا قسيمه الجواز و تعليقات من عينه و مالو لما يسبلوا لبعض يمكن مخطوبين
فعلا افكار غريبه بنسمع عنها و بيحاولوا يستغلوا فيها الدين ابشع استغلال

تحياتي ليك علي موضوعك المميز

كلاكيت تانى وتانى said...

شوف دى
اتشاركت مع زميل لى ع محل ملابس رجالى وحريمى وتناسيت الأسم وفكرت فقط فى الاوراق والمستندات وغيرة وفوجئت يوم الافتتاح انهم مسمينة يوني سكس فور الل
uni sex for all
همة يقصدوا ملابس للجنسين بس المعنى للى بيقرا عادى بدون فهم هيكون غلط طبعا رفضت الاسم وخرجت من الشركة تماما
احنا للأسف بتبع الغرب بهبل وبعبط شديديين وجهل تاااااااام دون وعى
ولو بصيت لقناة زى الناس كانت بدايتها اغانى افراح وفيديوهات لأعياد الميلاد ورجعت بقت دينية وبس وبعدها الان كلها اعلانات عن الحمل والتخسيس وبيع الهوا وخناقات مابين عمرو خالد واصحاب اللحى شئ مخزى ومؤلم
تحياتى

Dr. Eyad Harfoush said...

عزيزتي آيوية
ميرسي للتعليق الهام، ان شاء الله هاكتب عت موضوع الصحة و ابعاد النصب الديني فيها، زي ما قلت ، كل الهرتلة في الستهلكات كوم و الصحة كوم تاني خاااالص
تحياتي و تقديري و اعزازي

Dr. Eyad Harfoush said...

عزيزتي ميرو ديبو

أهلا بك للمرة الأولى في تغريدات الفجر، زيارة نتمنى أن تدوم، لقد حدثتني أختي عن مسابقة مسجد العزيز بالله هذه، فأرسلت لهم بالبريد سؤالا واحدا، من تمثلون في تيارات الفكر الإسلامي؟ لأنني شممت من موقعهم أنهم أشعريين ممن يسمون أنفسهم سلفيين ظلما للسلف الصالح و عدوانا عليهم ، فردوا علي بما فهمت منه أنهم كما حسبت ، فرددت عليهم بما معناه "ابقوا قابلوني لو حسنتوا اي صورة" فهم و من على شاكلتهم سر البلاء في امة الاسلام

تحياتي و تقديري

Dr. Eyad Harfoush said...

عزيزتي اجندا حمرا
كلها أمور لم يرد بها وجه الله و لا وجه الدين، كلها اما تجارة بالدين، او ركوب لمطايا الدين للوصول الى السلطة، فهذه هي طبيعتهم و ديدنهم منذ بدأوا و لليوم، أكثر من ستين عاما من الدجل المتصل
شكرا للتعليق الذي ننتظره دوما
تحياتي و تقديري

Dr. Eyad Harfoush said...

عزيزتي كلاكيت تانى وتانى

يا ريتنا بنستنضف في تبعية الغرب!!! يا ريتنا بنتبع اية امة ذات ثقل و هوية حضارية عليها القيمة، نحن ناخذ دوما كلمات و صرعات و تصرفات أمريكية بحتة، و من أدنى مستويات المجتمع الأمريكي ، من أحياء العصابات و الجريمة المنظمة

تحياتي و تقديري و أهلا بك دوما

The Alien said...

د/ إياد

أنا عارف إن بعيد من فترة كبيرة
بس دا ميمنعش إني متابع

أنا في حاجة مش فاهمها ف كلامك
حضرتك بتقول إن العلم لا ينسب لدين
وأنا موافقك تماما
بس كمان الحضارة لا تنسب لدين. ومتهيألي إن الإسلام هو الدين الوحيد اللي بيحاولوا ينسبوا ليه حضارة. ومع ذلك حضرتك بتقول إن كلمة إسلامي بتسعدك لما بتيجي مع الكلمة الصح .. وذكرت الفن الإسلامي والعمارة الإسلامية .. دا اللي أنا مش فاهمه .. مش الفن والعمارة دول حضارة؟ .. إذاي بتقول عليهم إسلاميين؟

أنا رأيي إن موضوع الحضارة الإسلامية دا خدعة كبيرة
تحياتي

Dr. Eyad Harfoush said...

صديقي العزيز Alien
أهلا و سهلا بك بعد طول غياب و بتعليقاتك المثرية للحوار

يمكن أختلف معاك بخصوص نسبة الحضارة و العناصر الحضارية للدين، العقيدة أيا كانت سواء سماوية أو بشرية أحد المكونات الجوهرية للزخم الحضاري

مصر مثلا نسيجها الحضاري مكون من أربع خيوط، خيط مصري قديم ، و خيط هيليني بحر متوسطي ، و خيط قبطي ، و خيط عربي اسلامي

أما عن نسبة الفن و العمارة للقبطي أو الاسلامي ، فهي تنسب للمكون الحضاري الاكبر تأثيرا فيها ، ففن عصر الشهداء القبطي الذي سيطرت عليه مسحة الحزن و القتامة بألوانه و خطوطه من الصعب ألا ننسبه لعصر الشهداء المسيحي، الفن الاسلامي تجده في العالم السني مسيطر عليه الرسوم النباتية و الاشكال الهندسية و تطور الخط العربي بناء على عقيدة معينة ، بينما في العالم الشيعي تجد تطور فن الأيقونات الشيعية بناء على اعتقاد مغاير

أنا مسلم ، لكن جزءا كبيرا من نسيجي الحضاري قبطي أورثوذوكسي ، و الدكتور ميلاد حنا هو من علمني ذلك حين يقول أنه مسيحي جزء من نسيجه الحضاري اسلامي، و هكذا ، أرجو اكون وضحت مفهومي ، بانتظار ردك
تحياتي و تقديري

The Alien said...

د/ إياد

لسه مش فاهم .. أو بمعني أخر مش مقتنع
لو هنقول فن قبطي يبقي قصدنا مصري .. بعيدا عن المسيحية. لإن الفن ف مصر أكيد يختلف عن الفن ف اليونان عنه ف إيطاليا رغم وجود المسيحية. العقيدة أكيد بتأثر وهي من أهم مكونات الفكر ولكن وجود نفس العقيدة مش بينتج عنه نفس الفكر .. يعني تأثير المسيحية علي الفن المصري غير تأثيرها علي الفن الروماني .. وهكذا.

إني أقول فن مسيحي أو فن إسلامي .. يبقي أنا بظلم أصحاب الحضارة الحقيقيين لإن لا المسيحية ولا الإسلام أصحاب فضل ف أي حضارة .. والدليل إختلاف الحضارات والفنون كمثال رغم وجود نفس الدين.

أنا مصري متأثر ب المسيحية والإسلام .. ولكن ف النهاية أنا هو من ينتج الفن والحضارة .. وليس الدين

بستمتع جدا بالحوار معاك
ولكن للأسف أنا مسافر 3 أيام
ممكن بعدها نكمل كلامنا
تحياتي
وشكرا علي سعة صدرك

The Alien said...

د/ إياد

لسه مش فاهم .. أو بمعني أخر مش مقتنع
لو هنقول فن قبطي يبقي قصدنا مصري .. بعيدا عن المسيحية. لإن الفن ف مصر أكيد يختلف عن الفن ف اليونان عنه ف إيطاليا رغم وجود المسيحية. العقيدة أكيد بتأثر وهي من أهم مكونات الفكر ولكن وجود نفس العقيدة مش بينتج عنه نفس الفكر .. يعني تأثير المسيحية علي الفن المصري غير تأثيرها علي الفن الروماني .. وهكذا.

إني أقول فن مسيحي أو فن إسلامي .. يبقي أنا بظلم أصحاب الحضارة الحقيقيين لإن لا المسيحية ولا الإسلام أصحاب فضل ف أي حضارة .. والدليل إختلاف الحضارات والفنون كمثال رغم وجود نفس الدين.

أنا مصري متأثر ب المسيحية والإسلام .. ولكن ف النهاية أنا هو من ينتج الفن والحضارة .. وليس الدين

بستمتع جدا بالحوار معاك
ولكن للأسف أنا مسافر 3 أيام
ممكن بعدها نكمل كلامنا
تحياتي
وشكرا علي سعة صدرك

Dr. Eyad Harfoush said...

صديقي العزيز Alien

ألف أهلا و سهلا بالاختلاف عندما يصاغ في أسلوب راقي و متحضر كأسلوبك

الفن القبطي اصطلاحاً هو الفن المصري في المرحلة التي شكلت فيها المسيحية الديانة السائدة في مصر ، برغم أت تعبير قبطي يعني لغويا مصري في الديموطيقية، كذلك الفن الإسلامي اصطلاحا هو الفن المصري في فترة ما بعد انتشار الاسلام، و هذا مع عدم انكار باقي العناصر الفاعلة في وجدان الفنان في الحالتين

برغم الاختلاف النابع من البيئة و الخلفية الحضارية، ستجد عناصر تميز الفن القبطي المصري وفقا للمعتقد الديني القبطي الأرثوذكسي ، و كذلك الحال في الفن ذو الخلفية الكاثوليكية، و ثالثا في العمارة الكنسية البروتستانتية التي تميل للتجريد ، هذا الخلاف نشأ من تباين عقيدة الفنان و الجهة الراعية للفن، نفس الوضع ينطبق على كل من فنون الاسلام الشيعي و السني، هذا ما عنيته

لكن دعنا نتفق على أنه من الصعب أن نقول "حضارة" إسلامية او مسيحية ، لكن ممكن نقول مكون حضاري اسلامي او مسيحي

تحياتي و تقديري و ترجع بألف سلامة

Dr. Eyad Harfoush said...

على ذكر نسبة الحضارة للدين، أنت على حق فيما يخص العصر الحالي ، لكن كانت هناك حقبة تاريخية سميت فيها أوروبا "كريستيندوم" و سمي فيها العالم غير المسيحي و خاصة الشرق بمسمى "آوتريمر" و هي فترة امتدت بطول العصور الوسطى

و أنا أتفق معك في عدم نسبة الحضارات للدين لأن المكون الحضاري الديني لا ينفي بقية العناصر الفاعلة في التكوين الحضاري

لكنني أختلف فقط في امكانية نسب الفنون و الفلسفات للأديان عندما تكون العقيدة الدينية هي الغالبة على طابعها

مع أطيب التحيات و التقدير

Meero Deepo said...

د.إياد

شكرا على ردك وترحيبك بى

أولا بالنسبة لمسجد العزيز بالله... ليس كل من يعمل هناك كما بدا لك...فعلا فيهم من ينحصر الإسلام عنده فى تطويل اللحية وتقصير الثوب ومنهم أخرون ..صحيح قلة لكن موجودون ...وهم من يحاولون فعلا توضيح صورة الإسلام الحقيقى

لذا فإذا كانت لديك النية لعمل البحث وأنا أعلم جيدا أنك قادر على ذلك فأرجوك دعك من هؤلاء وكن أنت حامل الراية...على الأقل ليكون لدينا شئ نقول أنا فعلناه للرسول عليه أفضل الصلاة والسلام عندما سنراه

ثانيا: بالنسبة للنسيج المصرى

أوافقك تماما على مقولتك أو بمعنى أصح تعبير د.ميلاد حنا وأنا من أكثر المعجبين بهذا الرجل... ودعنى أوضح لك شئ كنت دائما ما أقوله لصديقتى اليابانية....

فى مصر هناك المسلم والمسيحى وربما اليهودى ...ولكن كلا منهم صبغ مظاهر ديانته الخاصة بنكهة مصرية...
أعنى أن المسيحى المصرى يختلف فى تكوينه وتدينه وحتى مفرداته عن المسيحى الأمريكى أو الأوروبى

وكذلك المسلم المصرى... تدينه له نكهة تميزه عن أى مسلم أخر

وكذلك منظومة القيم المصرية مابين الغلط والعيب والحرام هى واحدة فى كل البيوت المصرية

مما جعلنى أعتقد دائما أن هناك برواز مصرى هو إطار لأى دين يدين به المصريون

وشكرا لك

Dr. Eyad Harfoush said...

عزيزتي Meero Deepo

لا شكر على واجب ، أما عن مسابقة مسجد العزيز بالله ، فأشكرك على الإيضاح ، لقد كان إحجامي عن المشاركة مبنيا على الرد الذي وصلني قائلاً أنهم "يرحبون بأي فكر لا يتعارض مع القرآن و السنة و القرون الثلاث الأولى المباركة" فبينما أنا أتفق معهم في وجوب الالتزام بمرجعية القرآن و السنة، إلا أني أختلف في مرجعية التطبيقات الأولى للمنهج الإسلامي في القرون الثلاث الأولى، فهي استرشادية و ليست وجوبية، وق كنت أحجمت برغم عزمي المسبق على مصنف بدأت فيه قبل المسابقة و أسميته "هكذا تكلم محمد" Thus Spoke Muhammad، و لكن بناء على نصيحتك، سأجتهد باتمام العمل و ارساله لهم ، فلو فاز لكان لنصيحتك كبير الفضل

أما عن أستاذنا الدكتور "ميلاد حنا" فأنا أيضا من المعجبين به، و كنت أقول معقبا على قوله أنه سيرحل على أول طائرة لو وصل الاخوان المسلمين للسلطة "يا ريت تحجزلي الكرسي الي جنبك على الطيارة يا أستاذنا" فلن تضيق مصر حينها بالاقباط و حسب، و لكن بالمسلمين أيضا ممن يخالفون الاخوان منهجهم

تحياتي و تقديري و شكري للنصيحة

Haytham Harfoush said...

نقاش جميل بينك و بين السادة المعلقين على المدونة حول موضوع نسبة الحضارات الى الديانات, أو بمعنى أخر هل يصح أن نقول حضارة اسلامية أو حضارة قبطية أو غير ذلك من تسميات الحضارة أم أن ذلك لا يصح , رغم استمتاعى بالنقاش لم استطع أن أنحاز لأرى دون الأخر, و أعتقد أن هذا الموضوع من الصعب الفصل فيه برأى, البعد الزمنى و الجغرافى لا يمكن اهمالهم عند تسمية الحضارات , اذا قلنا مثلا الحضارة المصرية القديمة, فهى حضارة مصرية جغرافيا و قديمة زمنيا, و لكن هناك أبعاد و عوامل أخرى أثرت فى هذة الحضارة, منها البعدين الدينى و الا جتماعى المتفاعلين مع احداثيات الزمن و الموقع, و بالتالى يمكننا القول بأن تسمية الحضارة المصرية القديمة تسمية ناقصة , أو هى تسمية صحيحة و أن البعد الدينى و الاجتماعى معلوم و مفهم ضمنيا بما أننا حددنا الزمان و المكان فى التسمية, من هذا المثال يتضح أن موضوع تسمية و نسبة الحضارات موضوع يصعب الحسم فيه, خصوصا و أنه لا توجد حضارة الا و قد أخذت من الحضارات السابقة عليها و أفاضت على الحضارات التالية لها , بل لا توجد حضارة الا و قد تأثرت و تفاعلت مع البعدين الدينى و الاجتماعى خارجيا و داخليا, لذلك من الصعب الفصل بين هذه الأبعاد الزمنى , الجغرافى , الدينى و الاجتماعى


تحياتى
هيثم حرفوش

Dr. Eyad Harfoush said...

أخي الحبيب قبطان هيثم حرفوش
الأمر كما قلت، من الصعب أن نسمي الحضارات تسمية جامعة مانعة، لهذا نسميها تسمية اصطلاحية و نتفق على معناها، و ان هذا الاصطلاح يشملها جميعا بمضمونه و ليس بلفظه، و هذا هو الأمر في الفن الإسلامي، فقد أثر و تأثر بمحيطه الجغرافي و الديموغرافي و الزمني، و مع هذا كان الدين فاعلا فيه بصورة صارخة من خلال التركيز على الزخرفة و النباتيات لاعتقاد ساد وقتها من الفهم الخطأ لبعض الأخبار عن الرسول، فسمي بالاسلامي اصطلاحا
تحياتي و تقديري لأخي الحبيب