أوتوجرافات الوهم

كل عام و أنتم جميعا بخير ، جمعت لكم من منتديات وبلوجات ومواقع إسلامية سنية وشيعية وقبطية هدية لطيفة، مجموعة أوتوجرافات أتمنى أن تعجبكم جميعا، أو تضحكم، وقد تبكيكم والبكاء أكثر رد فعل صحي، أوتوجرافات أراها نتيجة طبيعية للأثر المنوم لدعاة الفضاء الذين غدونا نحسبهم خشبا مسندة، تعالوا على رأي الدكتور "مصطفى محمود" رحمه الله نشوف مع بعض الصور

لفظ الجلالة وإساءة الأدب مع الله

المجموعة الأولى هي المجموعة التي يدعي البعض وجود لفظ الجلالة فيها، الأولى من أعلى اليمين طماطماية، وبجوارها جوزاية، ثم قطعة لحم (لو كان اللي صورها اداها لعيلة تاكلها كان هيبقى أحسن له عند الله من توهم اسمه تعالى مكتوبا بالكوليسترول)، تحتهم بقى تلاقوا قتيل عراقي، وقال ايه؟ الدم على إيده كاتب اسم الله علشان هو شهيد! حسبي الله، طبعا عادي إن الدم يسيل في خطوط ، اللي مش عادي إننا نتوهم لفظ الجلالة بدل مانشوف اللي بيحصل في العراق ده ليه وهيفضل لإمتى وازاي نواجهه؟ جنب الشهيد هتلاقي معزة، وجنبها سمكة، تحتهم جوز عيال ودانهم كاتبة الله، أستغفر الله العظيم، يعني لو واحد تكوين ودنه خد شكل شمعدان الهالاخاه بتاع اليهود يبقى الشمعدان مقدس فعلا؟ جنبهم بقرة وتحتهم السحاب وبعدين خلية نحل وبعدين الموج، آه والله الموج، شفت بقى؟ سبحان الله! ودايما مع كل صورة تلاقي الأفندي اللي حاططها مستخدم الآية الكريمة "سَنُرِيهِمْ آيَاتِنَا فِي ٱلآفَاقِ وَفِيۤ أَنفُسِهِمْ حَتَّىٰ يَتَبَيَّنَ لَهُمْ أَنَّهُ ٱلْحَقُّ" فصلت:53 ، وكأن هذه السذاجة هي آيات الله في الآفاق وليس عظمة الكون بكل ما فيه من آيات، وأعظم ما في الكون الثبات و ليس الشذوذ، القاعدة وليس الاستثناء، وحدة أسلوب الخلق الدال على وحدة الخالق، أن يكون عدد الفقرات في عنقك وعنق الزرافة وعنق السلحفاة واحد، نحن نتحدث عن الله تعالى اسمه، ومن سوء الأدب مع الله عز وجل أن ننسب له سبحانه هذه الصبيانيات ، "قَاتَلَهُمُ ٱللَّهُ أَنَّىٰ يُؤْفَكُونَ" التوبة:30

محمد عليه الصلاة و السلام

المجموعة التالية لاسم سيدنا محمد (ص) وتبدأ بالسحاب ثم برتقانة وبيضة وتحتهم شمامة، إنما الجامد قوي بقى الأخ اللي اكتشف الاكتشاف المذهل اللي جنبهم ده، إن البني آدم وهو نايم على ضهره هيكله العظمي بيكتب اسم الرسول! كان نفسي أبعت للأخ ده أسئل بيتعاطى ايه علشان أعرف دماغ إيه اللي بتعمل كده؟ ومستغربين من الرسوم الدنماركية المسيئة للرسول؟ هو الادعاء بوجود اسم الرسول على فاكهة الموسم ليس فيه سوء أدب معه صلوات الله عليه؟

المهم إن ما يدعونه دوما توقيعا باسم الله أو الرسول أو غير ذلك، هو إما تجريح في قشرة الفاكهة في أول النمو (و يسهل لهذا اختلاقه) أو عيوب تكوين في قشرة البيضة، يعني خلل، يعني الرسول اسمه هيظهر من خلال عيب في الثمرة ولا البيضة؟ ولا ربنا هيكتب اسمه بعيب خلقي في وش عيل؟ ألا يكون الله ورسوله أكرم علينا من ذلك؟

طبعا المجموعة دي واللي قبلها من مواقع اسلامية، ونجد اسم الله أكتر شيوعا في هذه المعجزات من اسم محمد (ص) لأن أي ثلاث خطوط متجاورة ورابع أقصر منها وفيه التواء يمكن توهم اسم الله فيه، لكن الميم والحاء في اسم الرسول تجعل الموضوع أصعب قليلا ، لذلك يكثر فيها الاختلاق من خلال برامج الجرافيك أكثر من الاعتماد على الصدف والعيوب العشوائية في الثمار وغيرها

وحتى "علي" إمام المتقين

طبعا إخوانا الشيعة عيب يسكتوا، جابوا من الآخر بقى وقالك ولا فاكهة ولا بتاع، القمر نفسه مكتوب عليه "علي"، وطبعا واضح مدى الوهم والتخريف، واللي جنبه دي بيضة تفاريح للعيال كده عليها اسم الإمام، بس بخط عربي جديد اسمه "الخط البهلولي" يكتب به البهاليل تخاريفهم وكذبهم، وجنبها تلاقي الشجرة اللي بتبكي دم كل يوم الفجر على سيدنا الحسين في العراق، رضي الله عنك يا سبط رسول الله، بذلت نفسك الطاهرة في كربلاء لتعطينا المثل على الثبات في الحق بعيدا عن حسابات الربح والخسارة، وواجهت أبناء الزواني ببضعة من أهلك وهم قد جيشوا لك جيشا، فهل نفعنا المثل يا سيدي وهل فهمناه أو عملنا به؟ أم حسب المخاليل والبهاليل أنهم بتوهم صورتك أو اسمك أو شجرة تنزف عليك حزنا قد أوفوك حق التضحية؟

بأسفل تلاقي عيل غلبان مولود بوحمة هيصرف عليها دم قلبه لما يكبر علشان يشيلها بالليزر، يقولك ده ابن شهيد واسم سيدنا علي على وجهه تكريما لأبيه، واحد تاني قالك لأ، ده اللي على وشه اسم "علاء" اللي هو اسم والده الشهيد، يا سلام، لو كل شهداء حروبنا خلفوا عيال ممضي عليهم كده كانت البلد بقت ملك، سبحان الله! جنبها بقى مع التقدم التكنولوجي واحد قالك بلا أسامي بلا كلام فارغ / إديها ديجيتال ووتر مارك، وآدي وش سيدنا الحسين ظهر على الحجر! اللي في الآخر دي بقى صورة للشيعة بيلمسوا الركن اليماني يوم ميلاد سيدنا علي علشان بيطلع عليه فطر معطر الرائحة كل سنة في تلتاشر رجب، لأن السيدة فاطمة بنت أسد ولدته رضي الله عنه في ذلك اليوم داخل الكعبة، علشان كده الإمام كان يسمى وليد الكعبة، شفت التجلي ده كله؟ طبعا الشوية دول من مواقع شيعية، بس دول شيعة غير شيعة حزب الله ، لإن لو حزب الله كانوا فكروا كده كان بقى عليه العوض وكان زمان اسرائيل في شمال لبنان مش طلعت من الجنوب، فلا داعي لأن يفرح المعادون لشيعة آل البيت، الهم طايلنا وطايلهم في خفاف العقول مش في المناضلين

والصليب أيضاً

طبعا لأن توحد صفوف الشعب في الهطل واحدة من ركائز الوحدة الوطنية في بلادنا، ماكانش معقول إخواننا الأقباط في مصر هيقعدوا كده، وطبعا الصليب مية مية، اي خطين متعامدين بقوا صليب، فخيرك بقى .. شجر وحجر وجبل وورد وفراشة ، بس اللي جامدة قوي الدراع اللي فيها غرزتين دي ، بيقولك الولد المتعور ده ابوه مرضيش يدقله صليب، طبعا لأنه راجل علماني ووحش، فكان انتقام السماء، قالك ربنا أصابه بجرح هنا عند الرسغ، والتعويرة تسيب صليب في نفس مكان الوشم، يعني ربنا أبو الواد ضايقه قام معور الواد؟ يا صلاة النبي؟ ده إيه الفتوح ده كله؟ طيب مش كانت ماما تاخد بالها من رضيع زي ده بدل ما تقول إن رب العزة هو اللي عوره؟ أستغفر الله العظيم من سوء الأدب مع الله والجرأة على الله؟

الصهاينة هم الأضعف هطلاً

دول بقى غلبوني علشان ألاقيلهم حاجة ملقيتش غير الكام صورة دول عند يهودي أهبل واحد، واحد بس، طبعا، مدام ناس بشغلهم خاتمين العالم كله على قفاه مش هيفضوا للهبل والإمضاءات دي، أصل كل دي يا إخواني وسائل ملتوية لتحقيق الذات، لما تيجي لشاب ضايع وصايع وتافه ، محتاج يحقق ذاته ويحس بتميز، يقوم يحس ازاي؟ يحس من خلال إنه الوحيد اللي على دين حقيقي والباقي واهمين ، حتى بص الفاكس الإلهي اللي جاي على الوردة ولا الشجرة ولا البيضة واللي سلقها واللي شواها

حتى الجوتاما بوذا؟

السمكة دي بقى من موقع بوذي ، وعينها ما شاء الله فيها صورة بوذا لو دققت قوي تشوفها، بوذا الذي لم يدع لنفسه أبدا أية قداسة ولا ألوهية ولا حتى نبوة، عاش ومات فيلسوفا مثل زرادشت، لكنه لم يسلم من هبل أتباعه، بالطبع لا أتوقع أن يكون من ضرب هذه الصورة بالجرافيك بوذي ياباني، ده شغل ناس فاضية، ممكن يكون هندي ولو أن الهند اليوم بدأت تأخذ طريقها لتغادر مؤخرة العالم التي نحتل نحن منها موضع فتحة الشرج، لتتركنا نستمتع بفضلات العالم منفردين، وما زلنا نحن نقول "إنت فاكرني هندي؟" للدلالة على العبط ، واحنا قريب ان شاء الله مش هيكون فيه أعبط منا ، وهيعملولنا خانة لوحدنا يسموها الدول موقوفة النمو، كمرحلة أدنى من تلك النامية

على اسم مصر

وقف الخلق ينظرون جميعا، دي بقى المعجزة الحقيقية الوحيدة في هذه الصفحة ، معجزة العلم والبحث والإبداع المصري الذي كان، ده تمثال رمسيس التاني اللي الشمس تدخل على وشه جوه معبده في يومين في السنة، يوم الميلاد ويوم التتويج بالتحديد، ده قبل ما نبقى أمة ضحكت من جهلها الأمم، قبل ما نشرب المانجة ونتهطل، ويتنقل المعبد وتمر آلاف السنين ومازالت الطبيعة صاغرة أمام علم المصريين الذين كانوا، هل يمكن أن نكون نحن أحفاد هؤلاء بحق؟ ده بقى بيفكرني بافتكاسة قوية جدا واحد علامة كوني خارق زي الداعية الجيولوجي كده بس أنكى وأشد، تعالوا نشوف مع بعض الهرتلة

نحن أحفاد قوم عاد ، وإرم هي الأقصر وكليوباترا اسمها وفاء، ورقصني يا جدع

لا مش هزار ده واحد فاكر نفسه بيتكلم جد ، وطابع كتاب وعامل موقع وحكاية جامدة جدا لقالها كام مهطول من مشايخ الزيت يصرفوا عليها والقشية بقت معدن ، النظرية قامت على صور جابها الأفندي من النت وماخدش باله إنها كانت نازلة في مسابقة لجرافيك الحفريات والأساطير، عملتها وكالة ناسا لخدمة تصوير فيلم، الصور دي لهياكل عظمية عملاقة، زي الصور اللي تحت دي، قالك الفراعنة دول لصوص سرقوا آثار قوم عاد وحفروا اسمهم عليها، وكمان كليوباترا دي اسمها الحقيقي "وفاء" (وأخوها اسمه حسن بالمرة بقى وواخد حكم في قضية إحراز سلاح)، وقالك إن إرم ذات العماد هي الأقصر، بس إحنا مضيعين، وكمان "آمون" اللي اسمه بيتردد من قبل اللغة الآرامية ما تطلع منها النبطية اللي طلعت منها العربية، طلع يا سيدي أصل اسمه "آمين" بس حرفت، وقالك إن اللي اكتشف الحكاية دي الأمريكان بس ساكتين علشان هم كمان بيقولوا آمين زينا، على فكرة الموضوع بتاع آمين ده له أساس، كان فيه بحث كده فعلا بس بالعكس، بيطرح إمكانية تطور آمين من آمون الفرعونية، لأن الفراعنة كان عندهم صلاة يردد فيها الكاهن عدد من الصفات الألهية وبعدها الناس تقول مع بعض "آمون" لنسب الصفات ليه، اللي الحمار ده ميعرفهوش إن الفكر ده فكر إلحادي تماما، لأنه فكر يقول بتطور الأديان الإبراهيمية من العقيدة المصرية عن طريق اليهود اللي عاشوا في مصر فترة، وغاروا من آلهة الأقاليم فابتكروا "يهوه" رب إسرائيل زي بتاح وسيت وغيرهم، يعني الضال المضل بيروج لفكر منكر للأديان السماوية، والناس تهلل، وييجوا على الشهيد العالم "فرج فودة" ويقولوا عليه منكر لمعلوم من الدين بالضرورة؟ آه يا بلد! الصورة بأسفل للهيكل العظمي من موقع من يسمون أنفسهم موقع أهل السنة والجماعة، فهل من حق أحد أن يقول أنه الناطق باسم كل من يتبع السنة النبوية المشرفة؟ وهل هذه صورة يضعون عليها شعارهم وينسبوها لأهل السنة؟؟

كيف ترى الله؟

سبحان الله المرئي في الكون وفي أنفسنا بغير ألعاب سيرك، سبحان الله الذي أراه في فطرة الإنسان ميالا للحق والخير والجمال مجفلا من القبح والشر والضلال ، وقدرة الله أراها في المجموعة النجمية فالمجرة فالكون المنظور فالأكوان الفرضية، وقدرة الله أراها في غرس قابلية التطور بالطفرات في الحيوان لتتطور الكائنات، وهو ما أنكره المهاطيل رغم كونه حقيقة علمية لا تقبل جدلا اليوم، ولا أرى في هذا تعارضا مع بداية الكائنات العاقلة ذات الوجدان والضمير مع آدم أبي البشر، سبحان الله في عظمة العقل البشري الذي يمر بطفرات كل يوم، والله ما أنكر المنكرون ولا جحد الجاحدون إلا بسبب العقلية الغوغائية هذه في فهم الدين، والبهاليل الذين يهللون لبدع وضلالات داعية الجيولوجيا العقيمة، وينفقون الملايين على صفحات مدفوعة له في الأهرام يتكلف المقال الواحد منها قرابة النصف مليون جنيه! متى نرجع لطريق العلم ونترك الخرافات؟ متى تظهر خوارزميات رياضية جديدة ممن ينتمي لهم الخوارزمي؟ صاحب أول آلجوريزم رياضي؟ لا أدري، لكن المؤكد أنني لن أعيش لأرى هذا اليوم ، فالإنسان عادة لا يعيش لعدة قرون رغم كل ما قاله ابن كثير الله يرحمه