كتلة الإمعات وعوانس الفرح

فاكرين شوية المقاطيع بتوع انتخابات الرئاسة 2005؟ اللي ميت مرتين قبل كده، واللي ملزقينه بتفافة، واللي فاقد الزمن والعصر، واللي انتخب مبارك وهو نفسه مرشح، تلك المجموعة من مقاطيع أحزاب الديكور الممولة من الحكومة، واللي عمرها ما هتعض الايد الكريمة اللي بتقبضها الدعم الرسمي عدا ونقدا، عملوا إيه تفتكروا؟ عملوا قائمة اتهامات وبيقولوا مجهزين محاكمة شعبية من رموز وطنية مجهولة للدكتور البرادعي ورفاقه، ورفاقه دول زي مانتو عارفين منهم النائب حمدين صباحي والدكتور حسن نافعة والدكتور سليم العوا، والروائي النابغ علاء الأسواني، وبقية مؤسسي اللجنة الوطنية للتغيير، وحددوا ميعاد المحاكمة المزاحية بعد بكرة، حاجة كده فيرتشوال زي انتخابات الندامة في 2005م، قال دول هيحاكموا دول؟ علما بأن أي اسم من الأسماء التي رصدتها هنا تساوي رقبة تلك الشلة القبضجية مجتمعين ومنفردين

محدش فكره يروح بعيد ويفتكرهم مزقوقين من حد، النظام فيه العبر أيوة بس مش هايف قوي كده، دول متطوعين زي عوانس الفرح، مين هم عوانس الفرح؟ في كل فرح هتلاقي كام بنت كده من اللي محتفظين بلقب بنت عنوة واقتدارا، حاطين ميك آب في ساعتين تلاتة، وعاملين تسريحة أسطورية في راسهم، والمحجبة فيهم لابسة راس كرنبة بترتر على دماغها، وتلاقيهم هارييين نفسهم رقصهم وتنطيط على المسرح حوالين وقدام وورا وفوق وتحت العريس والعروسة، عمال على بطال وبلا هوادة، دول حضرتك المشتاقات منذ عصور، عوانس الفرح، بيؤدوا طقوس الظهور التقليدية، يمكن ربنا يكرم بحد من المعازيم أو من اللي هيشوفوا شريط الفيديو ويسأل مين البنت اللي كلها طاقة دي :) إخواننا دول بتوع كتلة الإمعات هم عوانس الفرح السياسي، بيجاملو الحكومة من ناحية، على طراز أنا بتاعك يا بيه، ومن ناحية تانية تتنشر ليهم صور وأسماء في شوية جرايد، على شوية مواقع، ويمكن حد فيهم يرضى عنه ولي الأمر وتلطش معاه حقيبة وزارية ولا حاجة، لكن بصراحة رقصتهم المرة دي مبتذلة للغاية، ولحمهم العاري مقزز بلا حدود