14.3.10

كلمة شرف


يا ولاد بلدي .. يا ولاد بلدي .. أنا هتكلم كده بالبلدي .. الله يرحمك يا حليم

الحكاية يا أصدقائي بدأت من اجتماع موقر للجمعية الوطنية للتغيير،اللي دعا لتكوينها البرادعي عشان تكون مظلة للحركة الوطنية وقال بالحرف انها كيان حر مفتوح لكل المصريين، ايه اللي حصل في الاجتماع؟ نصه الأولاني قضوه في مناقشة هل نحل حركة أبو جلانبو، وتيار أم سيد، وجبهة الأندال ومصطبة العيال ونكتفي بالجمعية ولا نخليهم كلهم، ونحط عيشة جنب أم الخير، ونقضيها حركات وموبايلات؟ المهم في الآخر استقروا إنهم يبقوا متصلين منفصلين .. ماتسألنيش ازاي، اسأل حد من السادة السياس .. قصدي السياسيين، احنا ناس كنا معزومين غلطة أساسا ومش هتتكرر إن شاء الله، نص الاجتماع التاني قضوه في نمضي التفويض ولا التوكيل، بأسامي ولا مجهل؟ عرفي ولا مسيار؟ هل البيئة دي تصلح مناخ للتغيير؟ مش معنى ده ان التغيير صعب، التغيير جاي جاي بحكم محكمة التاريخ ورغما عن تهافت الكل حكومة ومعارضة

الحقيقة المرة إن كل الأحزاب ومعاهم أختنا المحظورة مش بيعارضوا، دول بيلعبوا معارضة في مسرحية كتب نصها وأخرجها وأنتجها النظام، وكل واحد له خطوات مرسومة ع المسرح مايقدرش يخطيها، حتى اعتقالات الإخوان قبل كل انتخابات والمؤتمرات اللي بعدها بتندد بالاعتقالات في فندق خمس نجوم ومؤتمر علني، ومقال عامر حسن الأخير في المصري اليوم واضح وفصيح لكل ذي عينين ... طيب لو ده حال السياسيين؟ يبقى الأمل ف مين؟ التغيير محتاج حد واعي بآفات الوطن والمبيدات اللي تنفع معاها، محتاج وعي كافي علشان مايتحولش لفوضى مدمرة، يبقى الحل ف مين؟ مين هيقدر يساعد الراجل اللي قرر يتعب نفسه على كبر وييجي يغرس نفسه معانا هنا؟ مين هيقدر يوفر له دعم حقيقي مش دعم على استحياء ولا دعم مشروط ولا دعم عاوز اللي يسنده؟ شباب الحملة ربنا يعينهم، لكن حماس الشباب لن يغني أي حركة تغيير عن منظريها ورعاتها، وفي الموضوع ده لا أمل لنا غير رهان واحد، هو المثقفين، والحمد لله فيهم كتير ناس نحسبهم على خير، ومازالنا نراهن إنهم مخلصين ومهمومين بالبلد دي، مش عاوز أذكر أسامي لأنهم فعلا كتير وأكيد هانسى أكتر ما أفتكر، بس دول كمان فيهم مشكلة، لكنها محلولة

مشكلة المثقفين هي صعوبة اتفاقهم، كل واحد له دماغ متأسسة صح وناشفة حبتين، وواخدة اتجاه مغاير، وده طبيعي ومن حق كل مثقف، بس ده في الآخر بيعجز المثقفين عن الحركة، لو حاولوا يقعدوا مع بعض بيتناقشوا لحد ما تخرب مالطة، طيب نحلها ازاي؟ ..... ماتيجي مانتفقش؟ محصلة الحوار والعصف الدماغي مع أصدقائي الثلاثة إننا ممكن منتفقش ونعمل حاجة كويسة برضو، واحد يقول لي ازاي؟ أقوله بكلمة شرف .. ميثاق شرف، التزام مش اتفاق، المرحلة دي محتاجة التزام بحاجة واحدة محترمة، بس يكون التزام ع الأرض، مش هنقضيها ايميلات وموبايلات ونطبطب على ضمايرنا ونخش ننام والصبح نتربط ف الساقية تاني، محتاجين التزام متبادل يحول المثقفين غير المتحزبين لصف واحد متماسك وإن ماكانش متجانس.

محتاجين المستقلين من المثقفين يسندوا بعض في معمعة التغيير اللي جاية قريب، علشان يكونوا فعالين مش تنظير وبس من بعيد لبعيد، إضراب الدكتور طه عبد التواب علم علينا كلنا وخلى شكلنا أهبل وعبيييييط قوي، عمالين نكتب ونتكلم، وهو بجوعه الفصيح قال كل حاجة، بعافية الألم والاعياء بعد أيام الاضراب عن الطعام كسر جبال الخوف من نمور الورق اللي بتخوفنا بضلها، لأننا مصرين منولعش النور العالي ونشوف الحقايق، طه عملها من غير لا طنطنة ولا شنشنة ولا كتر كلام، جسم نضاله بالصلابة رغم العناء ومن سكات، هو ده اللي محتاجينه، التزام بدون تنظير وبدون حركات وبدون منسق عام الحركة .. ومحسس خاص ع الحركة، الشيء الوحيد الصح النهاردة هو اننا نعمل حيطة على رأي صديقتي مها، حيطة صد ضد القمع علشان الناس تتحرك والدستور يتغير، والحيطة دي بنقترح إنها تكون ميثاق شرف وطني، ميثاق شرف يربط النخبة ببعضها بالتزام وقسم على المصير المشترك لحد ما يحصل التغيير، ويربطهم بالجماهير اللي ممكن تتعرض لتحرشات النظام، لحماية الجماهير دي، من خلال رد فعل جماعي لو حد اتعرض للضرب تحت الحزام من جهة أمنية، رد فعل علني وفي نطاق قانوني وحضاري، وده هنقوله بالتفصيل خلال أيام

2 comments:

Dr. Eyad Harfoush said...

Fatma A.M.
انا ليا راى فى الموضوع ده...عيب المثقفين..لان احنا كل واحد بيتثقف بطريقته..لان الثقافة عندنا مش اتجاه قومى..فا كل واحد و شطارته بقى..وعشان كده صعب نتفق..لان اغلبنا مش بيقرا فى كل الاتجاهات..لا ده اقرا قشور فى كل الاتجاهات و فى اتجاه عجبه..فا كمل فيه
حاجة تانية بقى المثقفين بقى بيكلموا بعضهم بس..وبيستعملوا الفاظ عقيمة و معقدة على ان اغلب الناس تفهمه... See Moreا وده سبب ان المثقفين مالهومش تاثير واقعى فى الحياة العامة..انا شخصيا و رغم انى متعلمة و بحاول اقرا كتير الا ان احيانا اقرا نوت لحد..اقوله يعنى ايه الكلام ده و كلمنا شعبى ياعم..لان الاقى السطر فيه عشر كلمات هى عبارة عن مصطلحات تعريفية مع ان فى بدائل من الكلمات سهلة و بسيطة

الحل فى راى لخلاص البلد دى...ان المثقفين ينزلوا يختلطوا بالناس و يعملوا حملة توعية للناس البسطاء اوى ..اللى بيدوا صوتهم قصاد مبلغ من الفلوس..مش عارفين المصيبة اللى بيعملوها..اللى بيروحوا ينتخبوا فلان و يقولك اصل اللى نعرفه احسن من اللى مانعرفهوش

Eyad Harfoush
والله مش عارف يا صديقتي، هل الصح ان المثقفين يستغنوا عن لغتهم؟ ويتبنوا لغة خنيق .. وحد كويس قوي .. وشيك آخر حاجة ولا العكس؟

Fatma A.M.
هو يعنى يا كده يا كده

بس انا هاقولك حاجة ماما زمان قالتهالى.....كان واحد جاهل كده و اتكلمت مع بعجرفة اوى..ده كان عندى 13 سنة..لما روحنا البيت..ماما قالتلى الفرق بين الجاهل و المتعلم ايه؟؟ان الجاهل مابيعرفش يتكلم غير بطريقة واحدة واسلوب واحد..يعنى عجبك تتعملى مع كده او لأ..المتعلم هو اللى يقدر ينزل لمستوى الجاهل و يعلى لمستوى المتعلم اللى زيه

Eyad Harfoush
كلامك صح من وجهة اصلاح حال المجتمع، يمكن انا بيقلقني في نفس الوقت الهاجس الأدبي، كل كتب الشباب اللي منشورة اليومين دول لغتها ضايعة نحويا واملائيا ده غير ان العامي 10 اضعاف الفصحى

Dr. Eyad Harfoush said...

Mamdouh El Nakeeb
المثقفين اللي بيكلموا بعض بس و بيستعملوا مصطلحات غير مفهومة ليسوا مثقفين بل هم مدعي ثقافة و من يعتقد أنه اعلم من الناس فهو أجهل الناس و طبعا أنا أستثني صديقي العزيز اياد من هذا فهو أحد القلائل المثقفين بحق و ان اختلفت معه في بعض التوجهات الفكرية و لكنني أحترم حتى اختلافي معه لا نه حد كويس قوي :) طبعا أنا لا استعمل هذه الألفاظ و لكن القافيه حكمت بصراحة


Eyad Harfoush
:) تمام يا دوحة