26.2.10

سمع هس .. الرقص بدأ


طبعا كل الناشطين والمثقفين وحتى المتابعين للموقف من الجماهير كانوا منتظرين بداية رد الفعل الحكومي على تحركات الدكتور محمد البرادعي المكثفة خلال الكام يوم اللي فاتوا، ولقاءاته بالنخب السياسية وشباب الناشطين في الحركة الشعبية لترشيحه، وكل ده بعد الاستقبال غير المسبوق اللي أدهش الجميع في مطار القاهرة الدولي، فالحق يقال البوليس يوم الجمعة الماضي في المطار كان في غاية الاحترام للجماهير، كأنك في سويسرا، وبعدها البرادعي صرح تصريحات نارية في لقائه بعمرو أديب ثم منى الشاذلي، وبعدين لقاء مع 50 شخصية بارزة وتكوين الجمعية الوطنية من أجل التغيير، بعضوية الشخصيات دي، وكل ده والنظام متبع سياسة ضبط النفس، يادوب مكتفي بشوية مقالات وأعمدة مكررة المضمون في الجرايد الحكومية وشبه الحكومية، ودي يعني يادوب تقسيم ع الطبلة وتوريق ع الرق، لكن مافيش رقص سياسي من اللي ممكن فيه يدي لخصمه "وسط قانوني" يعمله إعاقة سياسية

على هامش التوريق والتقسيم زاد عدد المجموعات الداعمة لجمال مبارك ع الفيسبوك، طبعا ما هو مش كله معارضين وناس مشغولة بالبلد والكلام الفارغ ده، فيه ناس شايفة مصلحتها تمام، فعدد محبي جمال مبارك ومشجعية على صفحته الشخصية 2428 معجب متيم، وكمان فيه مجموعة معمولة لتأييد ترشيحه ومنضم ليها 1627 بني آدم، ومسميينها أنا عاوز جمال مبارك، بس ماحددوش عاوزينه ف إيه بالظبط، وتلاقي كمان مجموعة لطيفة طلعت اليومين اللي فاتوا لدعم إعادة ترشيح مبارك الأب، وفيها 425 بني آدم، ده غير شوية مجموعات عدد الواحدة فيها مايزيدش عن 200 عضو، وأساميهم تموت من الضحك، خد عندك يا سيدي: أصدقاء جمال مبارك، محبي جمال مبارك، عاوزين جمال مبارك، مؤيدي جمال مبارك، بنحب جمال مبارك، جمال مبارك للشباب، جمال مبارك رئيسا لمصر، وهكذا

النهاردة مساء خرجت علينا جريدة اليوم السابع بخبر طازة عن أول بلاغ للنائب العام ضد البرادعي، وهو البلاغ رقم 3457 لسنة 2010، واتقدم بيه السيد/ خالد عبد الفتاح، رئيس مؤسسة مواطنون ضد الغباء السياسى، آه والله فيه مؤسسة اسمها كده وليها رئيس كمان، (أول ما قريت اسمها فكرت أعمل مؤسسة مواطنون ضد التعريص اللي ماشي في البلد) وسيادته مقدم البلاغ بدعوى أن الدكتور البرادعي يثير الفتنة السياسية ويستخدم كراهية الحركات والقوى السياسية للحكومة، بما يؤثر على أمن وسلامة البلاد فى الفترة الحالية، يا سلام!! سبحان الله يا أخي، إيه بقى موضوع فتنة سياسية ده؟؟ هل فيه حاجة في الدنيا وبأي لغة من اللغات الحية أو الميتة اسمها فتنة سياسية؟ عن نفسي ماعرفش غير الصراع السياسي وده مشروع تماما في أي إطار ديمقراطي وبلا حدود، طالما فيه احترام للملكية العامة والمؤسسات، لكن يبدو إن الفتنة السياسية ده اسم الدلع الجديد بتاع المحروسة بلبلة، اللي الهوا الطاير بيثيرها دايما دي، وبكده بقى يبقى الرقص اللي على أصوله بدأ، أهو كده الكلام، علشان نحس بالهوية ونفتكر إننا في مصر العزيزة، خاصة إن الأخ خالد في بلاغه بيدعي علاقة بين البرادعي ومركز ابن خلدون، كتلميح لوجود علاقة مع الولايات المتحدة، وبين السطور ممكن تشم ريحة تجهيز قضية اتصال بدولة أجنبية، تهمة سهل تلفيقها وحبكها زي اللي لفقت قبل كده للدكتور سعد الدين ابراهيم لما دخل في قصة حقوق الإنسان والكلام في الاقتصاد والفساد وخلافه .. وللحديث بقية

4 comments:

Dr. Eyad Harfoush said...

نقلا من الفيسبوك

Marwa El Marsafawy
Marwa El Marsafawy
هاهاهاهاهااهاهاه................. "هي دي مصر يا عبلة"
although I don't know really much about what's going on now except Tashash and the only egypptian chanel I have is the fada2eya then I hear only from one side and it is kind of they just ignoring el barad3y tamaman. I think what they are trying to tell us الكلاب تعوي و القافلة تسير و هما مطلعيين لنا لسانهم

Nachoua Ihab
والله انا خايفة عليه. دول ناس ماعندهمش اي مبادئ. والراجل محترم للغاية.

Eyad Harfoush
lollllllllllll Dear Marwa, this is really the style official media is adopting lately.. 3amleen mosh hamemhom 7aga. but the truth they are frightened to bones. Dr. Baradei formed a national committee of prominent Egyptian intellectuals and politicians to change the constitution of 2007. Has a very strong base in streets.. this is really different from anything before. cheers

Eyad Harfoush
عزيزتي نشوى، هم اللي مفروض يخافوا مش هو ولا احنا، على رأي نجم: هو مين فينا الجبان ولا مين فينا اللي خان؟ الحق قوة واللي معها الحق صوته عالي وقوي وواضح، والبرادعي مش سعد الدين ابراهيم، تحياتي وتقديري

Dr. Eyad Harfoush said...

Ossama Elhateel
رجاء قبول عضويتي في مؤسسة "مواطنون ضد التعريص اللي ماشي في البلد" كأمين للسياسات

Sally Noaman
انا لما قرأت اسم (مواطنون ضد الغباء السياسى) فى عنوان المقال و قبل ما اقرأ باقى الخبر توقعت ان المقال يكون تريقة,اصله اسم كوميدى جداً

Eyad Harfoush
صديقي مهندس أسامة، تشرف يا باشا :)

8 minutes ago ·
Eyad Harfoush
Eyad Harfoush
عزيزتي سالي، ما هو ده اللي بيقولوا عليه هم يضحك :)

طنطـــاوى said...

لا حول ولا قوة الا بالله ؟؟؟ حينما ترفض المعارضة اى معارضة ؟؟ حينما تصبح اللغة الرسمية للمثقفين هى لغة العوالم ؟؟ حينما تلقى فى اليم ما تبذل كل رخيص وغالى من اجل الحصول علية ؟؟ حينما يتحول الصفوة المفترضة الى مشجعين تالتة شمال وبدون شماريخ ؟؟ يبقى فعلا (((( مفيش فايدة ))))يا دكتور اذكرك بما نسيتة فى هذة المقالة الغريبة شكلا ونصا وموضوعا .....احترام الاخر هو مشكلة مشاكل الجهل العربى ... لا اظن انك من انصار الدستور الاخوانى " اللى مش معانا يبقى علينا " ...؟؟

انت تبحث وتنقب عن العشاق والمتيمين بجمال مبارك او غيرة وتبرز هذا كخبر ومدعاة للتهكم والضحك والسخرية فلا داعى لان نتحاور او نتناقش ولتكن لغة الحارة بمفرداتها من سباب وعويل وسنج ومطاوى هى لغتنا .....
هل تثتكثر على فرد -اى كان -ان يكون لة من المتيمين على حد قولك الفين او ثلاثة او حتى عشرة الاف شخص ؟؟؟

هل الدروشة للبرادعى وشقيقة على اصبحت من اركان الاسلام وكل من يخالفها فهو زنديق كافر يجب رجمة ؟؟
ألا يوجد على الفيس بوك مجموعات لايمن نور ونعمان جمعة وشعبان عبد الرحيم ؟؟
بغض النظر عن توجهات المعجب المتيم كما تصفة ( وحرقت دم ام اللى جابوا امى بتهكمك دة والمفترض انك مثقف ) لكن وارد كصاحب مصلحة او صاحب وجهة نظر مختلفة او ... او ...او ...ان تجد انصار لاى فكر او توجة ..؟؟اصغر تاجر مخدرات لة انصار ومؤيدين من الحشاشين اكثر من كل دراويش مبارك والبرادعى واوباما نفسة

دورك كمثق ان تعرض وجهة نظرك ؟؟ ان تفند وجهة نظر الاخر بصورة موضوعية ؟؟ ان تبدأ من نقاط التقارب لا ان تكون البداية ابعد نقطتى اختلاف واعلانها حرب ضروس ...؟؟

ان ارى مثل هذا الموضوع فى مدونة نوارة الساخرة او فى مقالة من مقالات عصر الضائيات ؟؟ فهذا امر عادى ومطلوب ... اما تتحول انت الى الساخر راسم الابتسامات فهذا ليس دورك
ان تتحول كلماتك وموضوعات مدونتك الى تشبية اعمى بما فى مدونات نوارة وحتى فى اسلوبها فى الكتابة ( مع احترامى وحبى الكامل لة ) يبقى علية العوض


ارجوك من فضلك ان كان لك فى قلبى بقية فلا تفقدها بتوجية اى اتهام لى بانى من الحزب الوطنى المدسوسين ومن الخائنين العملاء و....و...و كل تلك الاتهامات ((الفورمة ))التى يقوم بلصقها اى معارض حينما تعارضة

لانى بكل بساطة ان كنت فقدت الامل فى الماضى والحاضر فمصيبتى ستكون اكبر اذا رايت المستقبل نسخة مكرر بعباءة جديدة

Dr. Eyad Harfoush said...

عزيزي طنطاوي
لو كنت تقصد استخدام الأسلوب الساركازمي الساخر فده بيتوقف على الحالة المزاجية والنفسية للكاتب، أنا من زمان ساعات باكتب عامي وساعات فصحى وساعات ساخر، وإن غلب علي الطابع الجاد واللغة الفصحى

ثانيا، موضوع أن أتهمك بأنك مدسوس من أي جهة فهذا ما لم يحدث من قبل ولن يحدث أن أتهم أي شخص بغير بينة

اما موضوع أن أستكثر على مبارك وجمال مبارك وجود معجبين، فدعني أوضح أني هنا لا يهمني شخصهما، ولكن ما يجسدان من معاني، فالرئيس يمثل معنا البقاء في السلطة لأكثر من ربع قرن بالزور، وهذا لا يقبله ولا يعجب به إلا فاقدي العزيمة، ونجله يمثل التوريث المحتمل وهذا لا يقبله ولا يطلبه إلا العبيد والإماء

لو اتبعنا منطقك في حرية التعبير، لاعتبرنا عزام عزام صاحب وجهة نظر وليس خائنا، لا يا عزيزي، الانحياز للمصلحة ومهادنة الديكتاتورية لن تكون أبدا الا انتهازية رخيصة يلعنها التاريخ قبل أن نلعنها، لا يا سيدي، الخيانة ليست وجهة نظر والانبطاح للديكتاتور ليس موقفا لنحترم حرية صاحبه