19.9.10

منقوع الكتب


ماذا لو قرر الأديب الساخر بلال فضل بعد عشر سنوات من الآن في عام 2020م أن يعيد تقديم برنامجه الناجح "عصير الكتب" في سلسلة جديدة مع الكتاب الجدد وعناوين الكتب التي ستضاف للمكتبة العربية خلال العشر سنوات المقبلة؟ مبدأيا لابد لبلال أن يغير اسم البرنامج من عصير الكتب إلى اسم معبر عن طبيعة المرحلة وكتبها، وهو منقوع الكتب، لأن الكتب التي بدأت تسود الرفوف اليوم لو عصرت لن يخرج منها شيء ذو بال، فالأجدى أن تنقع، أما ثاني التعديلات فسيكون في اللغة المعتمدة للكتب التي يتناولها، فلن تكون الفصحى والعامية كما نفهمها لفظا وخطا موجودة وقتها في الغالب، وستحل محلها اللغة المرنة التي تظهر في إبداعات بعض المدونين اليوم، تعالوا نتخيل خطاب واحدة من المدونات لبلال، ماذا ستقول له؟ ولا خطاب إيه صحيح .. خلينا نقول أوفلاين مسيج على المسنجر
---
مساء الخير عليك يا أستاز بلال
اذاي حدرتك؟ انشالله تكون بخير، أنا موتشكرة أوي أوي إن حدرتك وقع اختيارك على كتابي "أحلام مزة" دي أكيد شهاده أعتاذ بيها، حقيقي يا أستاز بلال إنت حد جميل أوي، وأد كيده قدوة لكل الكتاب الشباب، موبايلات بقى هه
---

المكتبة العربية 2020م
لو حبينا نضرب مثال حقيقي لعبقرية تسمية عمل أدبي مش هييجي على بالي كاتب قبل إحسان عبد القدوس رحمه الله، عبقرية التركيز والجذب كانت دايما السمة الواضحة لعناوين رواياته، لم يكن أبدا لها، ومضت أيام اللؤلؤ، زوجة أحمد، العذراء والشعر الأبيض، الهزيمة كان اسمها فاطمة، لا أنام، ومش الروايات وحدها، وحتى مقالاته رحمه الله، زي "على مقهى في الشارع السياسي"، وعلى النقيض من المنهج ده، تعالوا نتخيل عناوين ومحتوى الكتب اللي ممكن بلال يعرضها في حلقات منقوع الكتب لعام 2020م
  • كتاب يوميات فتاة لايدة الجزء التاني من كتاب طالبة الستر، واللي بيناقش مشاكل تأخر سن الزواج بشكل أكثر صراحة ومباشرة من الجزء الأول
  • المجموعة القصصية وسط ساقط، للقاص الشاب علي معتز اللي كان أول أعماله رواية بنطلون جينز بدون كسرة، وهي أعمال متميزة لا يعيبها غير كثرة إعلانات مصنع الملابس بتاع والد علي بين فصول المجموعة
  • كتاب مصر اللي عمي مرافقها، واللي بيناقش قضية الانتماء من منظور جديد أجرأ من منظور كتاب مصر مش أمي دي مرات أبويا
  • كتاب شيكا بوم الجزء التاني من كتاب بيكا بو
  • كتاب أيوة متجوزة وانت مال أهلك؟ اللي بيناقش مشاكل الكام ست اللي فاضلين على ذمة رجالة في البلد
  • الرواية البوليسية لما تلاقي الخرابة، واللي بتدور في اطار مشوق في رحلة البحث عن الـ..... مجرم
وفي النهاية، ولو كانت أحوال البلد دي ماشية في نفس الاتجاه اللي كلنا نفسنا نعرفه، بلال ممكن يختم بجزء تاني من كتابه خفيف الدم ضحك مجروح، واللي ممكن يكون على ايامها اسمه ضحك مدبوح

4 comments:

آخر أيام الخريف said...

مع احترامى يا دكتور .... و مع اتفاقى مع حضرتك فى نقطة إن إحسان عناوينه مشوقة و جذابة فعلاً ... لكن لابد أن أنوه و للأمانة إن إحسان عبد القدوس له قصص كتير جداً سطا عيها من الأدب الفرنسى بدون الأشارة لمصدرها ... و بقول "سطا" و أنا أعنيها تماماً لكنه مكانش بيقتبس و يمصر ده كان بينقل حرفى ...الأمثلة كتير أقربهم لذهنى دلوقت لا تتركونى هنا وحدى مسروقة من قصة فرنسية اسمها قصر اليهودية ..... وغيره و غيره :(((

تحياتى يا دكتور و شكراً للمقال :))

Dr. Eyad Harfoush said...

الحقيقة يا دكتورة لم اقرا الاصل الفرنسي، فلا يمكنني ان احكم
، ولكن عموما من احسان لعبد الوهاب للرحبانية كانت حدود الاقتباس واسعة جدا في ذلك العصر، كما كانت واسعة عندما ترجمت اسبانيا وايطاليا الفكر العربي الفارسي في بدايات عصر النهضة، ربما كانت احد سمات عصور النقل الحضاري
تقبلي تحياتي وتقديري وشكري للملعلومة مع وفد بمحاولة قراءة الاصل الفرنسي لو وجدته بالعربية او الانجليزية

آخر أيام الخريف said...

متفقين تماماً يا دكتور ..و إن كنت أحترم تماماً فى الرحبانية إنهم غالباً كانوا بيشيروا للمصدر اللى اقتبسوا منه .

حضرتك مقلتليش الاقى الرواية بتاعة حضرتك فين؟؟

Dr. Eyad Harfoush said...

عندك حق بخصوص الرحبانية طبعا، رحمهما الله
اماكن توزيع اعمالي هنا
http://eharfoush.blogspot.com/p/blog-page_11.html
ويمكنك لو شئت ان ترسلي لي بريدك لارسلها لك مرفقة في ملف وورد
تحياتي وتقديري وشكري