24.6.10

الحياة أونلاين


بما أن إخواننا في اليابان يتوقعون وصول القاهرة لحالة الشلل المروي الكامل بحلول العام 2013م لو استمر الحال على ما هو عليه، يبقى المتوقع إن جلوس الناس أمام الشاشات يزيد وتتضاعف مساحة الإنترنت والموبايل وما شابههما في حياتنا، وبمرور السنين قول على سنة 2023 مثلا هيكون عندنا جيل إلكتروني في كل شيء وعايش حياة افتراضية تماما، يا ترى هتبقى الحياة دي شكلها ايه؟
  • في حالة العزاء هيكتب أهل المتوفي "نوت" ع الفيسبوك ينعون فيها الفقيد، ويضيفون "تاج" للأقارب والأحباب، واللي هيدخلوا بالتبعية ويسيبوا تعليقات العزاء، والمستعجل فيهم ممكن يسيب "ايموشن" باكية :( ، في ذكرى الأربعين يشكر أهل المتوفي على الستيتس بتاعته كل من شاطرهم الأحزان بالتعليقات والرسائل القصيرة والرنات
  • بر الوالدين هيكون بزيارة صفحة أحدهما أو كليهما يوميا وترك تعليق لطيف، أو صباح الفل ع الوول، وكمان مننساش نعملهم تاج لما نرفع صورة جديدة لواحد من أحفادهم علشان يفرحوا بيهم وهم بيكبروا قدامهم صورة ورا صورة
  • هتصدر دار الإفتاء المصرية (فتوى أونلاين) فتواها بجواز التصدق على المساكين بتحويل رصيد لموبايلاتهم، طالما كان المحول إليه كارتاً وفي فترة السماح، والفتوى هتصدر بعد تعاقد المفتي مع فودافون كمستشار للاتصالات الإسلامية
  • واحدة هتسأل الواعظ الإلكتروني على موقعه لو كان ممكن تحسب هداياها لأصحابها المعذورين في فارم فيل من زكاة المال ولا لأ
  • الأفراح كمان ممكن تبقى أونلاين، المأذون يقول الصيغة ويرددوا وراه على السكاي بي، ويبعت ايميل إخطار لاتنين شهود، ويطلب منهم يضغطوا على لينك لتأكيد الشهادة، وبعدين يصدرهم ميل زواج فيه رقم سري المشترك، وبالتالي يغيروا الستيتس بتاعهم ع الفيسبوك فلان متزوج من فلانة، ويعملوا ايفينت زفاف، والعروسة تركب طرحة وفستان على أي صورة قديمة عندها بالفوتوشوب، والحبايب يبعتوا صور بوكيهات ورد ع الوول بتاعته، محدش يسألني الدخلة الإلكترونية هتتعمل ازاي، بلاش قباحة
  • حفاظا على البعد الروحي، هيكون فيه مساجد وكنايس إلكترونية، وخطب جمعة ومواعظ آحاد "ستريمينج" وايميلات اعتراف لأبونا
  • صلة الرحم طبعا مهمة، إيميلات ورنات وتعليقات وكلمني شكرا وخلافه لكل الأهل والأقارب، علشان وقت الجد تعمل جروب تضمن تلاقي فيه 30 ولا 40 عضو من قرايبك
  • الحب والصداقة والزمالة وكافة أشكال العلاقات الإنسانية الإلكتروني هتزدهر طبعا، ودي شغالة من دلوقت زي ما كلكوا عارفين، الجديد إن مش هيبقى فيه غيرها، يعني مفيش ماء وخضرة ووجه حسن، ممكن تشغل مؤثر صوتي للماء وتحط صورة ديسكتوب خضرا والوجه الحسن في صورة البروفايل، ولا عزاء للشعراء
  • الطبقية هتفضل موجودة زي ما كانت دايما، وهيكون فيه "أم تامر" الشغالة اللي هتدخل بفيرتشوال آي دي ع الديسكتوب عندك تروقه وتنظم الفايلات وتمسح الذاكرة وتنضف الهارد ديسك وتعمل فيروس سكان شامل، والأجرة تلاتين جنيه رصيد تحوله لرقمها
  • الموت الإكلينيكي يشخص لما الماذر بورد تضرب، والعناية المركزة لما الباور سابلاي يحصل له مكروه لا قدر الله
  • الرئيس محمد حسني مبارك هيحتفل بعيد ميلاده السادس والتسعين، والحزب الوطني الالكتروني يعلن ترشيحه لمدة الرئاسة التامنة، علشان خبراته كطيار مقاتل وكان بيعرف يدوس على زراير لوحة التحكم في الطيارة تخليه أنسب واحد لمصر في المرحلة الافتراضية دي
  • شباب 6 أبريل بيدعوا لعصيان عام بأن كل واحد يقفل الكمبيوتر يوم 6 أبريل 2023م تماما وميفتحوش طول اليوم، وإشاعات إن اللي هيقفل الكمبيوتر يومها هيقطعوا عنه خط التليفون وبالتالي الإنترنت ويموت م الجوع
  • توقيعات التأييد للجمعية الوطنية للتغيير تكسر حاجز المائة ألف توقيع في ديسمبر 2023م، والدكتور محمد البرادعي يطالب برقابة على انتخابات الرئاسة الإلكترونية، والسماح بالانتخاب بالآي بي بدون استخراج باسوورد من قسم الشرطة، طبعا القسم هيفضل حقيقي مش افتراضي بعدما فشلت كل محاولات الداخلية لابتكار طرق للتعذيب الافتراضي

4 comments:

Dr. Eyad Harfoush said...

Maha El-badry
ده على كده 2023 هتبقى مملة قوي....اصلا كل ده بيحصل دلوقتي...خاصة العزا والفرح...ده حتى العريس بيتقدم لعروسته دلوقتي اونلاين...بدل ما يروحوا مطعم ويعملها مفاجأة...بيعمل بوست ويتاج صحابهم...ويقولها...فلاااااانة...بحبببببببك..تتجوزيييني...طبعا الخناقات اصلا كلها تشات...بيتهيألي الكبلز عمرهم ما سمعوا صوت بعض بيتخانقوا قبل كده....بجد يعني 2023 دي هتبقى قديمة اخر تلات اربع حاجات...انا كده هحبط...
June 25 at 1:10am ·
Alaa Eldin
Alaa Eldin
مش عارف الواحد لما ايامه الجميله يحصلها دليت تفتكر ممكن يوصل بسهوله للمثوى الاخير بواسطه الG .P .S
June 25 at 1:30am ·
Rasha Mosaad
Rasha Mosaad
That's a brilliant piece, although it is a very dark scenario !!!!
June 25 at 8:52am ·
Mourad Ben Taghrouit
Mourad Ben Taghrouit
waw !!!
June 25 at 9:05am ·

Dr. Eyad Harfoush said...

Eyad Harfoush
عزيزتي مها
بجد والله؟ معلش انت عارفة انا بحكم الجيل متأخر الكترونيا، ولو ان الجهر بالكلمة امام الناس لا يخلو من فكرة رومانسية، لكنه يجب أن يكون بعد المطعم مش بديلا ليه :) بعد الشر عليك من الاحباط يا ألف الجيل
June 25 at 10:58am ·
Eyad Harfoush
Eyad Harfoush
عزيزي استاذنا علاء الدين
المثوى الأخير كمان هيبقى فيرتشوال، في الريسايكل بن، بس ملف غير قابل للريكفري :) تحياتي وتقديري وشكري
June 25 at 10:59am ·
Eyad Harfoush
Eyad Harfoush
Dear Mrs. Rasha, thank you, and it might be dark as we really live dark days in this country dear :) kind regards
June 25 at 11:00am ·
Eyad Harfoush
Eyad Harfoush
Dear Mourad
Thank you for commenting and glad u liked it
June 25 at 11:01am ·

Dr. Eyad Harfoush said...

Nahla Eldakadosi
على فكرة ده مش هيبقى 2023 ده حالا كمان سنتين يمكن كلنا مبنتعاملش دلوقتي الا بالنت ومعدتش فارقة المسافر اخر الدنيا بتشوفه بس عالنت واللي ساكن في الشارع اللجنبك برضه مبتشوفوش الاعالنت ودي تبقى ايه دي
June 25 at 6:51pm ·
Eyad Harfoush
Eyad Harfoush
عزيزتي نهلة
وياك حق، تسارع الأمور بقى أكتر من خيالنا، على فكرة أظن كم القرف اللي في الشارع مساعد على الحياة اونلاين دي، انت عارفة مثلا اني كنت أحب أخرج دايما، ومن كام سنة بس دخلت البرج الالوميتال ثم الدير في المقطم هههههههههههه الواحد مش عاوز يحتك بالشارع الا في اضيق حدود وللضرورة فقط، ربنا ييسر والدنيا تتغير
تحياتي وتقديري واعزازي
June 25 at 9:40pm ·
Elsayed Didamony
Elsayed Didamony
كان زمان يقولو الوحدة عبادة الان نقول النت والحياة الحديثة لغت الوحدة ربنا يخلي اصدقاء الخيرويسمعنا علي كل الاصدقاء كل خير
June 25 at 10:50pm ·
Eyad Harfoush
Eyad Harfoush
يا رب يا عزيزي أستاذ سيد، وإن كانت الحياة أونلاين ممكن ألا تخلو من عبادة لو كان فيها دعم لهدف كبير
تحياتي وتقديري وشكري
June 26 at 8:40am ·

Dr. Eyad Harfoush said...

منة الله محي
تصوير يبدو واقعي بناءا على اللي احنا فيه دلوقتي.. بس يا رب ما يتحقق حتى نصه
June 26 at 7:13pm ·
Heaven Sniper
Heaven Sniper
فيه سيناريوهات ل 2023 اسوأ من كده بكتير
على الاقل دى هتبقى موجودة بس افتراضية
انما لو فضلنا على استهلاك معدلات الطاقة دى والاحتباس
تقدر تقول مش هيكون فيه حياة
وﻻ افتراضية ولا غيرها... See More
الكوارث عديدة
تسلم استاذى
June 26 at 11:52pm ·
Eyad Harfoush
Eyad Harfoush
عزيزتي منة الله
كلنا لا يتمناها، ولكنها قد تصير حتمية لو استمر الانسان منجرفا وراء تكنولوجيا الاتصال كما نفعل كلنا اليوم
تحياتي وتقديري
June 27 at 9:36am ·
Eyad Harfoush
Eyad Harfoush
عزيزي Heaven Sniper
صدقت بكل تأكيد، هذا من جهة الطبيعة، وهناك من ناحية أخرى هيمنة صهيونية اقتصادية ان لم تكن عسكرية على المنطقة وهيمنة يمينية متطرفة على العالم لو لم يحدث سيناريو غير محسوب
أشكرك مع تحياتي وتقديري
June 27 at 9:37am ·